الجزء الأول
الوقت: الساعه 11 و النصف صباحا.. يوم الثلاثاء
المكان: الكووفي هاوس.. جامعه الامارات
المكان مزدحم كالعاده..اللي يغني…واللي ياكل..واللي يحل واجباته..اليازيــــــــه، حصـــه ووديمه يالسات على الطاوله المجاوره للباب، ثلاث بنات في جامعه الامارت زميلات عمر، كل وحده تعرف الثانيه اكثر من أختها، اليازيه طالبه في السنه الثالثه وتدرس إداره الاقتصاد، بنت جميله بشهاده الكل أغلب بنات الدفعه معجبات فيها.. بس مجرد ما يكتشفن هدووءها و انعزالها عن البقيه.. البنات يبتعدن عنها.. لمحه الحزن في عيوونها ما تفارقها، وديمه طالبه فالسنه الثالثه تخصص أدب انجليزي بنت شخصيتها مررحه وشعارها فالحياه طنش تعش، في حين أن حصـــه طالبه في السنه الثانيه تدرس الادب النجليزي مثل صديقتها وديمه ولكنها متأخره سنه في الابتدائيه بسبب دلعها ولانها آخر العنقود في عايلتهم، اليازيه وحصه توأم فالروح كل وحده ما تخبي عن صديقتها أبسط الامور وكل يوم حصه تتصل باليازيه تخبرها نشره الاخبار بالتفاصيل. والسبب الاكبر اللي يخلي حصه تتعلق في اليازيه ان اليازيه كانت بنت جيران حصه وتجمعهم ذكريات الطفوله في نفس الحاره.
حصه: يزوووووي يالله ما بقى شي عن المحاضره ورايه خط، تعرفين الله ياخذ مخج (أحد المباني في الجامعه) اخر العالم، وانتي وديمه يالله شووه تسوين من الصبح على لابتوب البنت يالله نشي متا بنوصل.
وديمه: ياربي من هالبنت دوّوم مستعيله.. حد يعجب بدكتوور جزائري غيرج انتي يالملقوووفه!!
اليازيه تضحك عليهن
حصه: لا و الله انا مب معجبه فيه.. انا الرمسه يوم يرمس ما افهمله كيف اعجب فيه.. بس انتي يالشيخه هاذا اخر غياب عندج وبتحرمنين.. مب منج من اللي يحاتيج!!!!!
وديمه: ياربي لازم تذكريني بهالكابوس.. تعالي يزووي أباج تترجميلي هالقطعه بس الله يخليج
حصه : ياربي متا بنوووصل.. ودوووم (وديمه) حرام عليج هذا الواجب من شهر عاطنا اياه وانتي الين الحينه ما سلمتيه!!!
اليازيه: ما عليه…خمس دقايق بس.. بشرحلها حرام ما فينا ترسب من متى وهيه تعيد هالمساق عنبوه انتي لحقتيها…
حصه: ما عليه بس يزووي بجيك على الماسنجر شوي اووكي الين ما تخلصن؟؟
اليازيه : عيوني لو تبينهن …..كم حصوني عندنا
حصه : يعلني ما خلا من عيونج …. عنبوه عيووون ظبي
وديمه: بسم الله..قولي ما شا الله..مب كفايه عيون البنات كل ما تدش الكافتيريا ييلسن ايطالعنها ناقصينج انتي..
اليازيه : اللي يسمع اخافني مكله جمال الكون و انا ما ادري..
ويضحكن البنات على سوالفهن
حصه: يزووووووي لحقي عليه …
اليازيه : لبيه …شوه بلاج حصه
حصه: تذكرين سالفت بحث مساق المجتمع ….اللي قلتلج عنها
اليازيه : هيه بس بعدني ما خلصت البحث يالسه اشطب عليه
حصه : لا يا ربي
وديمه: خير شوه مستوي اتقولين مزيغنج قطو اسود …شوه صاير
حصه: ناصر ولد عمي محتشر عليه في الماسنجر..يقولي وين البحث..ترا تعرفين لو الموووت ما يسوي نويصر بحث وقلت حق يزووي تعطيني نسخه من بحثها بعطيها اياه
وديمه: لا و الله البنت تكرف من اربع شهوور وهيه تكتبه وتبين تعطينه ولد عمج جيه كاش
حصه: وديمه لا تتدخلين بتخربين البنت..ما تعرفينه انتي نويصر..ايشل الدنيا..و بعدين الولد شاطر ….شوه يدرس هندسه وهاي اخر سنه اخليه يرسب عسب بحث!!
وديمه: و ليش يرسب …ياخذله بحث جااااهز من المعهد …و الله الشباب ما يغلبهم شي
حصه: عاااد هوه طالبني و انا ما برده …و بعدين يزووي ما عندها اعتراض صح زوزو؟؟
اليازيه : لا ما اعندي مانع بس جنكن تأخرتن خمس دقايق
حصه: ودووووووم …. الحق ما تلحق…..الكلاس بداااااااا
وديمه وهيه تغني و تغمز حق اليازيه : جيتك على الموعد ولا جيت وش عن لقانا مانعك
حصه: انتي يبالج ضرب الين ما تخيسين اي موعد انتي بعد هاذا الا دكتوور
اليازيه: عيل ليش احتشرتي.. اقص عليج بعدهن عشر دقايق
حصه: اووهوووو ….بصراحه هووو حلـــــــــــيو
ويضحكن اليازيه و ووديمه عليها..حصه: يزوي سمحلينا انا ومطارزيتيه الخاله وديمه بنتوكل..لا تيلسين اروووحج سيري عند شله موزووه خليفه يايبه صور عرس اختها يجنن …عنبووه مكياااج ..رهيب
اليازيه : ان شا الله عموووه حصه..بعدين ودووم تللق من البياض انتي اللي تصيحين البياض .
حصه : برايني مب بيضا بس علينا انتي اتقولين سوريه وبعدين هاذي الجامعه الله ياخذها مسودتني
اليازيه: يالله يالله ..الحقن على الكلاس
سارت كل من وديمه وحصه الكلاس.. ويلست اليازيه برووحها..وهيه اتقول في خاطرها .. ياربي لا تحرمني منهن..ما حد بقالي فهالدنيا ونيس غيرهن..راشد وتوفا..وشلت اللابتوب تبا تكمل الواجب مالها ..وهيه اتحل تفاجئت انه الماسنجر يشتغل وفي حد يكلمها..استغربت .. حاولت اتشوف تفاجئت بالكلام اللي مكتوب: " حصووووه..ما عليه وين اللي بيطلع وعنده محاضره..تقصين عليه ..بس ما عليه انا اليوم بخطف عليج العصر ابا البحث ضروري الدكتوور محتشر يباه..لقيتيه ولا لا ؟؟ ردي ولا تراه و الله دوااااج عندي.."
اليازيه فالبدايه خافت لانها ما تعرف منوه اللي يتكلم..بس بعدين يوم دققت واكتشفت انه حصه نست الماسنجر يشتغل..ترددت ما عرفت شوه اتسوي.. اذا سكرته تخاف تسوي مشاكل حق حصه و بيقولولها ليش تسكرين في ويهنا…فقالت احسن شي اطنش
بعد خمس دقايق " حصيص وووووووووووجع..وينج؟؟..اذا ما رديتي الحينه لا تلومين الا عمرج"
ارتبكت اليازيه فاضطرت انها ترد
اليازيه :" منوووه معاي؟؟"
الطرف الثاني : " لا والله فقدتي الذاكره اونج..لا تتهربين …"
اليازيه : " لو سمحت ممكن اعرف منوه معاي" خافت اليازيه انها لو تكلمت عن حصه اتوهقها،
الطرف الثاني : " زكيه زكريا معاج"..
اليازيه : " شوه هاذا عن الطنازه" ،
الطرف الثاني: :" ما عليه اليوم بتفاهم وياج العصر بخطف على خالد اخوج العصر بنسير دبي وبييج نصيبج "
اهنيه اليازيه لاحظت انه يعرف حصه زين وانه يعرف اخوها خالد فقالت احسن شي اقول الحقيقه: " اسمحلي اخويه… انا مب حصه بس هيه كانت فاتحه الماسنجر من جهازي عشان جيه انا يلست اسأل"
بعد فتره صمت … الطرف الثاني : " كيف يعني.؟؟؟… انتي مب حصووه انتي ربيعتها؟؟"
اليازيه: " هيه "
الطرف الثاني : " السمووحه اختيه ما قصدت بس اتحراج بنت عمي حصه " ..
اليازيه :" لا عادي الاخو .. ما صار الا الخير.. مع السلامه".
الطرف الثاني :" لحظه لحظه الشيخه.."
اليازيه :" خير شوه صاير؟؟"
الطرف الثاني : " انا ناصر ولد عم حصوه .."
اليازيه سكتت وعرفت شوه في خاطر ناصر.. فحبت انها تطنشه،
ناصرر: " تدرسين انتي صح؟؟"
استفزها السؤال فردت من دون لا تفكر" عيل شوه يالسه اسوي في الجامعه"
ناصر:" قلت يمكن موظفه.. احيدها حصه مراسلتنا فالجامعه تعرف كل الناس من البواب الين عميد الجامعه" .
هنيه ضحكت اليازيه في خاطرها.. حصه دايمن ترمس عن ولد عمها وفي يوم من الايام حصه واليازيه كانن يلعبن وياه في حوش بيتهم الشعبي…ولا فوق كل هاذا كان دووم يغايض اليازيه وهيه صغيره.. فقالت في خاطررها سبحان الله يالوقت كيف يمر….
ناصر:" شوه الشيخه لا يكون رقدتي..على العموم هاذا رقمي …شكلج بنت حليوه …بس لا تتصلين الحين …اعرفكن البنات مب شايفات خير…لانه بعد شوي بسير عندي امتحان…بعد الساعه 2 ايكون اوكي…اوكيه الغاليه ؟"
تفاجئت اليازيه شوه ترد ولا شوه تقول…حست انه لسانها انربط..فكتبت وهيه تفور من الغيظ رغم انها من النوع الهادي ونادرا ما تعصب : " شووف أخويه انته وايد خقاق … بعدين بنات العرب مب لعبه..حشم رمستك انا ما بغيت ارد عليك بالاساس بس ما حبيت اسكر الماسنجرفي ويهك واسوي مشكله حق حصوني"
ناصر: " هههههههههه..حصوني ما احيد حصه تحب حد يزقرها جذيه الا ربايعها القراب منها.. على العموم انا بظهر الحين و الرقم عندج لا تسوين عمرج شريفه مكه.. انتن فالبدايه جيه وبعدين تأذونا بالتيلفونات" عصبت اليازيه و سكرت الماسنجر في ويهه…
ما قدرت اليازيه تتحمل..فقامت وسارت تيلس عند ربيعتها موزه وحاولت اتشوف الصور بس هيه ما قدرت اتركز لانها طول الوقت اتفكر فاللي قاله ناصر.. ويلست تلوم عمرها ليش اترد عليه من البدايه…و حست بالضيق.. لانها هيه اللي غلطانه المفروض انها اتسكر الماسنجر على طول..بس هيه ارتبكت وردت عن طيب نيه… فقالت في خاطرها المهم انه ما يعرفني و بينسا الموضوع لانه حصه تقول انه مغازلجي ومستغل انه الله عطاه الجمال وما يخلي بنت ما يرمسها فكيف بيتذكر وحده شافها على الماسنجر عشر دقايق… حست بالراحه و ما وعت الا ربيعتها مووزه اتقول: في عرس اليازيه بنخلي صالون ..يعدلها لانه يعدل العيون بشكل فظيع وعيوون اليازيه رووعه كيف بيظهر عليهن الاي شادو السموك..ما قدرت اترد لانها مست وتر حساس في حياتها..الا العرس…
فطوم(ربيعت موزه): لا لا لا يزوووي لا تسمعين رمستها اذا عرستي لا تحطين اي شادو اسود انتي بروحهن عيونج ايجنن بس فجي شعرج ما شا الله عليه وحطي ايا شادو خفيف وردي بتخبلين بريلج…تقطع قلب اليازيه اكثر و حبت اتغير السالفه
اليازيه: انا ما بعرس الا اذا انتن عرستن…وحاولت تضحك هيه حتا مب قادره تمسك دموعها
موزه: انعرس نحن!!.. الله يعينج بتبطين..وينه هوه الريل..خليه ايدق الباب و انا بملج في ساعتها
ضحكن البنات على سوالف مووزه
فطوم: يعني خطبج ولد خالج ليش ما طعتي.؟؟!!
موزه: الله يخليج حرام عليج ..ما لقيتي الا علوووووه …ما حبه
اليازيه: و شوه فيه علي مب ريال
موزه: ريال بس ياختي ما فيني مطلق
فطوم: ولو شوه فيها ما عنده عيال
موزه: لا و الله و اخذ واحد مطللللللللللللق…لا يا حبيبتي
اليازيه: موزه اذا هوه ولد خالج وطلق ما فيها شي يمكن ما قدر يتفاهم معاها و الحياه نصيب
فطوم: ولا ازيدج من الشعر بيت الريال يموت فيها كمن مره خطبها..وحرمته الاولى ماخذنها غصب.. وما قدر ياخذ مويز هاذيج الايام لانها بعدها فالثانويه وخاف اهلها يرفضون
اليازيه: يا عيني على قيس بن الملوح…موزه فكري لا تسرعين الريال شارنج
موزه: مادري مادري
فطووم: الله ياخذ بليسج…ناس لاقيه وناس مب لاقيه شي..شوه اقول انا.. يا ختي ابا اعرس واظهر ويا ريلي واييب عيال كتاكيت اربيهم يا خووفي اعنس …لا ياربي بنتحر ولا اني اعنس
هنيه غرقت اليازيه بهمومها مره ثانيه وقالت انتحر ولا اني اعرس ما با عيال خلاص الدنيا مب حلوه بلاك يا راشد.
فالبوابه كانت اليازيه يالسه تتريا الدريول اتأخروا عليها ..وما حست الا بحصه ووديمه توهن داشات البوابه…
صارخت حصه: يزوووي شوه تسوين هنيه..
اليازيه: اتريا الدريول …تأخروا
وديمه: و نحن يالسين انقول الحين يزووي تغدت و في سااابع نوومه
ضحكت وديمه وحصه بس اليازيه ما قدرت تضحك بسبب المواقف اللي استوتلها اليوم اول شي سالفت ناصر وبعدين سالفت موزه و العرس
حصه: يزوووي عنوني..شوه فيج مب طبيعيه
اليازيه : لا و الله ما فيني شي بس صدعت
وديمه: ما تنلامين تقولين الحشر في يوم القيامه..حشا مليون بنت في هالحجره اللي ما تقولين الا بيت ضب
حصه: حشا هالكثر بنات عنبوه عرسن و فكنااااا
اليازيه: يا سلام عرسي انتي و بتفضا الجامعه
حصه: لا و الله بتصبرين عني انا …. انا حصه بنت راشد الجامعه بدوني ما تسوا شي
وديمه: لا و الله تراج وايد شايفه عمرج…و انتي مناك السيده ملعقه
حصه: لا و الله السيده ملعقه و انتي يالفيله جاااااااازووورا
اليازيه : بس الله يخليكن اللي يشوفكن اتناقرن جنكن دياي….ههههههههه
وديمه: اقول اليازيه…ما بتتحولون بيتكم اليديد
اليازيه: والله من اسبوعين ننقل الاغراض والبيت زاهب بس امايه يعني ما اخلا منها ما تصبر عن بيتها ونخلها…يمكن هالويك اند اذا رد احمد اخويه من بوظبى اليوم وما كان عنده زام بيقنعها انتحول الخميس فليل.
حصه: والله … الحمدلله… و اخيرا زوزو توأم روحي بيسكنون عدالنا
وديمه: ليش انتو ما كنتو ساكنين عدالهم بالاساس
حصه: حوووو..هاذيج ايام البيوت الشعبيه والحاره كنا ساكنين عدالهم بس نحن ويدي وناصر ولد عمي اتحولنا في منطقه الفلل بيتنا وبيت يدي في حووش واحد
وديمه: هيييييييييه….و الحين فلتكم وين اليازيه؟
حصه: طالعو هاذي اسميج خلاص شكلج مسطله..نقولج بيتحولون عدالنا من سنتين وهم يبنون.
على طاري ناصر حست اليازيه بالصداع اكثر…و بين عليها
حصه: اقول اليازيه قومي بوصلج شكلك تعبانه وايد..
اليازيه: لا لا الحين بيوون دقيت للدريول وقالي بيمر على شيشه البترول وبيي…وبعدين وين بيتكم وين بيتنا
حصه: لا و الله …اللي يسمع ساكنين في ورا الشمس…بس مب مشكله يوم بتتحولون كنسلوه دريولكم انا بوديج وبييج
وديمه: لاو الله و انا ؟؟؟؟ ولا انا مالي رب
حصه: لا لا استغفر الله منوه يصبر عنج نتي فيلتنا بس نتي الله يهداج تعفصينا وبعدين لازم انخطفج كنتاكي فقرتينا.
وديمه: الله اكبر الحينه انتو ما عندكم فلوس عيل وين الشركات وكل سنه مسافرين لندن.. برايج امبوني ما با صدقه منج الله يطول بعمر اليازيه بنت علي ما تقصر
اليازيه: يالتقردين هاذا كله عسب كنتاكي…خلاص على حسابي ومن عيوني لو تطلب عيوني
وديمه: الللللللللللللللللللللللللللله عليج …و الله ما يسووونك يالغالي المزيون
حصه: ما عليه ودووم بنشووف هاذي اليازيه راعيت اكل البيت تطبخ حلويات ومحاشي ومجبابيس ما تحب المطاعم منوه بيعطيج ويه غيري..بتردج الحايه..بعدين بسم الله لا تغنين صوتج ايوعي الميت من قبره لو سمعج حمد بن سهيل بيعتزل الشعر..
~~~~~~~~~~~~~~~~~~~~~~~~~~~~~
خلص الدوام و كل وحده ركبت السياره و ردت البيت
اليازيه ردت بس هيه بعدها حاسه بالذنب…وحاولت تقنع عمرها بأن الموضوع ما يرزا.. ان شا الله ناصر ما بيسأل حصه عن الموضوع …
العصر
حصه: الو ….
احمد ( اخو اليازيه): الو مرحبا
حصه ارتبكت وما عرفت شوه اتقول بالعاده اللي يرد على تيلفونهم ام اليازيه ولا خدامتهم بس هالمره صوت ريال..يمكن غلطت…لا لا ياربي انا متاكده
حصه: وين هاذا؟
احمد: بيت منوه تبين انتي
خافت حصه أكثر: أأأأأأأأأأأأأأأأأأأأأأأأأأابا بيت زوزو
احمد: زوزو؟؟
حصه: لا لا بسم الله …..قصدي بيت علي ابا اليازيه
احمد : الياااااازيه …هيه الحين اليازيه اتدلعونها زوزو
حصه: خلاص خلاص بسويلها بعدين
احمد: لا لا لا صبري …لحظه بزقرها توها كانت تشوف التلفزيون ... اليازيه اليازيه…
اليازيه: لبيه احمد …
احمد : لبيتي حايه ان شا الله .. في وحده ياهل تباج
من القهر والفشيله قامت حصه و سكرت التيلفون
اليازيه: الو الو … اقول احمد ما حد يرد
احمد : و الله العظيم شوه اقص عليج يعني و قالتلي تبا زوزو
اليازيه: ههههههههههه… هاي حصه… حليلها اكيد تبا شي
احمد: منوه حصه هاي بعد؟
اليازيه : ربيعتيه….تحيده راشد اللي كنا ساكنين عدالهم و اللي اخوه سعيد متوفي
احمد: هييييييييييييييه….تذكرت ناصر وخالد عيالهم
اليازيه: لا ناصر ولد سعيد اللي توفا اخو راشد بس هاي حصه بنت راشد
احمد: هيه حليلها بس كانت خايفه لا يكون صوتي يخوف فالتيلفون
اليازيه : لا هيه بالعاده تدق على موبايل امايه بس لانه الموبايل مب عندي عشان جيه ما رديت.. خلاص بسويلها بعد شوي
حصه..ياربي منوه اللي رد على التيلفون..اكيد الحين فاطس عليه من الضحك..يا ربي يالفشللللله …لا يكون اخوها احمد..لا يا ربي ما فيني على الفشله اسميهن بيضحكن عليه ضحك يزووي و ودووم بس دواهن ما بخبرهن
((حصوووه حصوووووه))
حصة: ويييييييييييييييي هاذا ناصر
حصه: هلا هلا ناصر شحالك
ناصر: بخير الله يعافيج بنت العم …اقولج انا من ربع ساعه ملطووع هنيه سيري شوفي اخوج خالد وين ورانا خط دبي
حصه : ليش على وين ناويين
ناصر: و انتي شوه يخصج …دبي يعني شوه نسوي فيها
حصه: لا و الله تقنصووون يعني…بقولك تبا تسير سير برووحك لا تخرب اخويه، الريال خاطب.
ناصر: لا والله اخووج يخرب بلد…
حصه: يمكن ياخذ شور لانه من شوي راد من صلاه العصر و قالي انه يترياك.
ناصر: يالله بتريا امري لله معرووف خالد اخووج باااارد …ساعه الين ما يتسبح..اقول يالله حصيص سويلي جاااهي وحطي فيه حليب ولا تنسين سندويجات الجبن والبيض…بسرعه
حصه: لا و الله ربيتك ونسيتك….وبعدين ما حيدها خالوه مريم بخيله ليش ما تأ كلك
ناصر: اولا خالتج مريم ما تقصر ما تخلي شي ما تسويه حقي ما تنلام وحيدها حشاشه يوفها…وبعدين انا شارد عن لا يشوفني يدي محمد ما فيني بيقولي يالله انسير العزبه..و بعدين انتي شوه خانتج؟؟
حصه: حشاااا …… على قد ما تاكل ما يبين فيك
ناصر : لا و الله بسم الله عليه جسمي الكل يتمناه بعدين انتي سندويجاتج والجاهي اللي تسوينه لا يقاوم…مب جاهي بشكارتنا ماي و شكر
حصه: اللهم طولج يا روح من طلباتك
ناصر: حصووه تعالي…
حصه: نعم مولاي
ناصر: مولاج غصب عن خشمج….وين البحث؟
حصه…تذكرت الموقف اللي صار لانها كانت متصله تسأل اليازيه عنه: البحث؟؟
ناصر : هيه البحث؟؟
حصه: باجر باجر بتيبه ربيعتيه
ناصر: ربيعتج؟؟؟
حصه : هيه
ناصر: منوه ربيعتج؟
حصه: وحده يمكن انته ما تذكرها..
ناصر: ليش انا اعرفها؟؟؟
حصه: تذكر يوم كنا صغار فالبيت الشعبي..ييرانا علي بن سيف وبنتهم كانت تعلب ويانا وانته دووم تضربها
ناصر: لا تقولين يزوووي ام عقص طوويل … اللي دوم امطها وتسير اتصيح عند يدي وانهزب بسبتها
حصه: هيه عليك نوور هيه…تذكر مره يوم كنا نركب على يدار البيت ونمشي عليه وهيه ما طيع
ناصر: هيه اذكر …حليلها يلست اقوولها يالخوافه يا حليلها يوم ركبت ترخطفت و طاحت.
حصه: الله ستر ما ياها شي
ناصر: هيه و الله كفايه الهزاب اللي انهزبته بسبتها..أقووول لا يكون هيه اللي اليوم كنتي اتكلميني فالمسانجر من جهازها
حصه و هيه فاجه عيونها: شدرااااااااااك؟
في هاي اللحظه نقع نااااصر من الضحك و ما قدر يتكلم
حصه: نويصر..بس عااااد شوه صار. خبرني..يا الله لا يكون خليت الماسنجر يشتغل وسرت انا عنه…
ناصر و هوه يضحك و يهز راسه
حصه: لا يكون قلتلها شي ….ناصر اعرفها حركاتك لا يكون فضحتني جدام البنت!!!
نااصر: خليها على الله و هوه يضحك
قولوا رايكم بعدين بنزل الجزي الثاني
موضوع: قصــــــــــة روعــــــــــــــة (ياقلــــــــــــــــبي) 
